گھوٹکی کے قریب تین ٹرینیں ٹکرا گئیں

آج صبح صوبہ سندھ کے شہرگھوٹکی کے قریب تین ریل گاڑیاں آپس میں ٹکرا گئی ہیں جس کے نتیجے کم از کم تین سو افراد ہلاک ہو گئے ہیں۔ زخمیوں کی تعداد تین ہزار بتائی جا رہی ہے ۔ ریلوے حکام کے مطابق کل سترہ بوگیاں متاثر ہوئی ہیں ۔ ٹریفک کنٹرولر کے مطابق حادثے میں تیزگام ایکسپریس کی بارہ بوگیاں، کوئٹہ ایکسپریس کی چار اور نائٹ کوچ کی تین بوگیاں پٹڑی سے اتر کر الٹ گئی ہیں۔

لاہور سے کراچی جانے والی کوئٹہ ایکسپریس میں گھوٹکی کے قریب سرحد ریلوے اسٹیشن پر مرمت کے لیے روکا گیا تھا۔ پیچھے سے آنے والی نائٹ کوچ (کراچی ایکسپریس) کوئی صبح ساڑھے چار بجے کے قریب اس سے جا ٹکرائی۔ اتفاق سے اسی وقت دوسرے ٹریک پر کراچی سے لاہور جانے والی تیزگام ایکسپریس گزر رہی تھی ۔ نائٹ کوچ کھڑی کوئٹہ ایکسپریس سے ٹکرا کر پٹڑی سے اتر گئی اور سامنے سے آنے والی تیزگام ایکسپریس سے ٹکرا گئی۔

ریلوے کے سکھر ڈویژن کےٹریفک کنٹرولر محمد اشرف لنجار کے مطابق حادثہ نائٹ کوچ کے ڈرائیور کی غفلت سے پیش آیا کیونکہ سگنل دیے جانے کے بعد باوجود اس نے ٹرین سرحد ریلوے اسٹیشن سے پہلے نہ روکی اور کوئٹہ ایکسپریس سے آ ٹکرایا۔