۔ شیخ عبداللہ کانگرس کے نرغے میں اور ماؤنٹ بیٹن کی عیّاری JK6

قائداعظم محمد علی جناح کے تجربہ سے سبق نہ سیکھتے ہوئے 1939 میں شیخ عبداللہ اپنے دوست پنڈت جواہر لال نہرو کے جھانسے میں آ گیا اور مسلم کانفرنس کو نیشنل کانفرنس میں بدل دیا ۔ شیخ عبداللہ کو 13 جولائی 1931 کو کہے ہوئے ایک شہید کے آخری الفاظ بھی یاد نہ رہے کہ ہم نے اپنا کام کر دیا اب آپ اپنا کام کریں ۔

شیخ عبداللہ سے مایوس ہو کر 1941 میں چوہدری غلام عباس اور دوسرے مخلص مسلمانوں نے مسلم کانفرنس کو بحال کیا تو تقریبا سب مسلمان اس کے جھنڈے تلے جمع ہو گئے ۔ اس وقت اعلان کیا گیا کہ ریاست کی تحریک آزادی دراصل تحریک پاکستان کا حصہ ہے ۔ اس تحریک کو میرے دادا جان کی مالی امداد اور اخلاقی اعانت حاصل تھی ۔

قائد اعظم محمد علی جناح مئی 1944 میں جموں کشمیر گئے اور دو ماہ وہاں قیام کیا جس کے دوران وہاں کے سیاستدانوں بشمول شیخ عبداللہ اور دانشوروں سے ملاقاتیں کیں ۔ 26 جون کو سرینگر میں منعقدہ مسلم کانفرنس کے سلانہ اجلاس سے خطاب کرتے ہوئے قائداعظم نے فرمایا کہ مسلمان اپنی قومی جماعت مسلم کانفرنس کے پلیٹ فارم سے اپنی تحریک جاری رکھیں اور چوہدری غلام عباس کو مخاطب کر کے کہا ہندوستان کے دس کروڑ مسلمانوں کی ہمدردیاں آپ کے ساتھ ہیں ۔

وائسرائے ہند لارڈ ماؤنٹ بیٹن نے 3 جون 1947 کو نیم خود مختار ریاستوں کے متعلق یہ فیصلہ دیا کہ وہاں کے حاکم جغرافیائی اور آبادی کی اکثریت کے لحاظ سے پاکستان یا بھارت کے ساتھ الحاق کر سکتی ہیں ۔ یہ فیصلہ مبہم تھا اور بھارت اپنی طاقت کے بل بوتے پر بھارت کے اندر یا بھارت کی سرحد پر واقع تمام ریاستوں پر قبضہ کر سکتا تھا اور ہوا بھی ایسے ہی ۔ بھارت نے فوجی طاقت استعمال کر کے پاکستان کے ساتھ الحاق کا اعلان کرنے والی ریاستوں یعنی حیدر آباد دکن ۔گجرات کاٹھیا واڑ اور مناوادور پر حملہ کر کے قبضہ کر لیا ۔ وجہ یہ بتائی کہ وہاں مسلمان اکثریت میں نہیں تھے ۔ مگر مسلم اکثریت والی ریاستوں کپورتھلہ اور جموں کشمیر پر بھی فوج کشی کر کے قبضہ کر لیا ۔

باقی انشاءاللہ آئیندہ