رمضان المبارک

کل عام و انتم بخیر ۔ سب کو رمضان مبارک ۔

کورے یا اصولی علم ہندسہ کے مطابق پاکستان میں کل شام نیا ہلال نکلنا تھا مگر عملی علم ہندسہ کے مطابق نہیں نکلا اور آج شام سے پہلے نکل آئے گا ۔ چنانچہ رمضان المبارک کی پہلی تاریخ اور پہلا روزہ کل ہو گا ۔ اصول اور عمل کی یہی تفاوت ہمیں عمل کی دعوت دیتی ہے ۔ اسی لئے کہا جاتا ہے کہ کہنے اور کرنے میں بہت فرق ہوتا ہے ۔ آئیے ہم سب عملی طور پر ثابت کریں کہ ہم مسلمان ہیں اور اس مبارک مہینہ میں اللہ کی خاص رحمتوں کا بھر پور فائدہ اٹھائیں ۔

رمضان المبارک برکتوں کا مہینہ ہے ۔اللہ سبحانہ و تعالی نے اس میں ہر اچھے عمل کا دوسرے مہینوں کی نسبت کئی گنا ثواب رکھا ہے ۔ اللہ سبحانہ و تعالی میرے سمیت سب مسلمانوں کو صحت و ہمت دے کہ سب خلوص کے ساتھ پورے روزے رکھیں ۔ آمین ۔

اپنے ساتھ اپنے رشتہ داروں ۔ محلے داروں ۔ واقف کاروں اور ملازمین کا بھی خیال رکھیئے ۔ بالخصوس ان کا جو کم آمدن کی وجہ سے عام دنوں میں بھی کم کھانے پر مجبور ہوتے ہیں اور اپنی عزت نفس کے باعث اس کا اظہار نہیں کرتے ۔ حسب توفی‍ق ان کی عید کی خوشیوں میں شریک ہو کر اللہ کی خوشنودی حاصل کیجئے ۔ ہو سکتا ہے ان کے پاس عید کے لئے صاف کپڑے بھی نہ ہوں ۔

روزہ صرف بھوکا رہنے کا نام نہیں ہے ۔ جو کام یا حرکات دوسرے مہینوں میں منع ہیں وہ ماہ رمضان میں بھی منع ہیں ۔ رمضان بری عادات (مثال کے طور پر سگریٹ نوشی) کو چھوڑنے کا موقع مہیا کرتا ہے ۔

سب سے درخواست ہے کہ اپنی اچھی دعاؤں میں مجھے بھی یا رکھیں ۔ ممنون ہوں گا ۔